Në fshatin Dobrosh të komunës së Gjakovës, është zbuluar pllaka përkujtimore e ish-spitalit ushtarak të Ushtrisë Çlirimtare të Kosovës. Të pranishëm ishin kryetari i komunës, Ardian Gjini, veteranë të UÇK-së dhe banorë të kësaj ane.
“Familja Haxha në atë kohë hapi derën, për të shndërruar shtëpinë në një spital ushtarak. Falë saj dhe të gjithë banorëve, me qindra ushtarë sot jetojnë dhe ne do të jemi mirënjohës gjithmonë” ka thënë kryetari Gjini.
Ndërsa, veteranë të UÇK-së kanë falënderuar banorët e kësaj ane për kujdesin e treguar ndaj tyre në ditët më të vështira. “Do t’i respektojmë dhe nderojmë gjithmonë banorët e Dobroshit” janë shprehur ata.
Ngritja e pllakës përkujtimore të ish-spitalit ushtarak të UÇK-së në fshatin Dobrosh është financuar nga familja Haxha.
