Më manifestimin përkujtimor të organizuar në Shqiponjë edhe këtë vit u shënua 17 maji, dita e dëshmorëve të komunës së Gjakovës.
Të pranishëm në këtë tubim ishin përfaqësues të institucioneve qendrore e lokale, përfaqësues të shoqatave të dala nga lufta, familjarë e shumë bashkëqytetarë.
“Sot ta zëvendësojmë ngushëllimin me urim, sepse në këtë datë Shqiponja e fitoi lirinë falë rezistencës së ushtarëve të brigadës së saj. Andaj kokën lart dhe ndjehuni krenarë!” më këto fjalë iu drejtua të pranishmëve kryetari i Komunës së Gjakovës, Ardian Gjini.
Qëndresën dhe luftën jo vetëm të djemve dhe vajzave të komunës së Gjakovës por të të tërë Kosovës e kujtuan dhe e nderuan edhe kryetari i Kuvendit të Kosovës, z. Kadri Veseli, Ministri i Forcës së Sigurisë, z. Rrustem Berisha, Gjenerali e deputeti, z. Daut Haradinaj e të tjerë.
Para fillimit të tubimit qëndror, janë bërë homazhe dhe janë vendosur kurora me lule pranë varreve të dëshmorëve dhe martirëve të komunës së Gjakovës.
