Kryetari i Komunës së Gjakovës, Ardian Gjini, mori pjesë në ceremoninë e përmbylljes së programit të HALO Trust në Kosovë, pas 27 vitesh angazhim në çminimin dhe pastrimin e mbetjeve eksplozive të luftës.
Me këtë rast, kryetari Gjini vlerësoi kontributin e kësaj organizate në rritjen e sigurisë në Kosovë, duke theksuar se puna e saj ka mundësuar kthimin e familjeve në pronat e tyre dhe shfrytëzimin e sigurt të tokave.
Ai shprehu mirënjohje për të gjithë punonjësit dhe donatorët që kontribuuan në këtë mision, me falënderim të veçantë për drejtuesin e programit, Atholl Stewart, dhe ekipin e HALO Trust në Kosovë.
Në ceremoni morën pjesë edhe përfaqësues të ambasadave dhe institucioneve ndërkombëtare, të cilët vlerësuan kontributin e organizatës në pastrimin e mbetjeve eksplozive dhe sigurinë e qytetarëve.
