Misioni i OSBE-së në Kosovë në bashkëpunim me mekanizmin koordinues komunal kundër dhunës në familje dhe komitetin konsultativ për personat me aftësi të kufizuar ka organizuar sot në Gjakovë një punëtori e cila kishte për qëllim informimin lidhur me objektivat e Konventës së Stambollit dhe standardet e tjera të barazisë gjinore në nivel lokal.
Ky aktivitet u organizua në mbështetje të fushatës “16 ditë aktivizmi kundër dhunës me bazë gjinore” e promovuar në mbarë Kosovën.
Në këtë takim pjesëmarrësit diskutuan çështjet, përfshirë ndryshimet në kornizën ligjore për dhunën në familje, procedurat standarde operative për rastet e dhunës në familje, buxhetimin e përgjegjshëm gjinor dhe aktivitetet e ndërgjegjësimit për promovimin e barazisë gjinore dhe luftimin e dhunës me bazë gjinore.
Me rastin e Ditës Ndërkombëtare të Personave me Aftësi të Kufizuara, aktiviteti ofroi mundësinë për anëtarët e komitetit konsultativ për persona me aftësi të kufizuara për të diskutuar sfidat e tyre me të cilat përballen në trajtimin e rasteve të dhunës në familje.
