Aktivitetet për shënimin e 28 nëntorit, ditës së flamurit, u përmbyllën me festivalin folklorik mbarëkombëtar “N’Odën e Malësisë së Gjakovës”.
Në edicionin e tretë të tij, tashmë ky festival ka krijuar identitetin e tij përmes tingujve autoktonë që prezentohen çdo vit.
Në këtë edicion morrën pjesë gjashtë Ansamble të cilat prezentuan programin e tyre artistik. Shoqëritë kulturo-artistike që morrën pjesë ishin: “Anamorava” nga Vitia, “Jeta e re” nga Mali i Zi, “Zëri i Llapushës” nga Malisheva, “Viset e krabës” nga Tirana, “Dance+Folk” nga Elbasani, “Dardania” nga Tropoja si dhe grupi “Ardhmëria”.
Festivalin e hapi drejtoresha për Kulturë, Rini dhe Sport, Saranda Hyseni Maloku e cila tha që “edhe përkundër situatës me pandeminë, kjo datë e rëndësishme nuk mund të anashkalohej. Por, sot le të jehojë kënga e vallja”.
Plisi, xhamadani e qiftelia, simbole të shqiptarisë ishin sinonimi më i bukur i përmbylljes së aktiviteteve që shënuan 28 nëntorin në Gjakovën e kuqe.
