Kryetari i Komunës, Ardian Gjini, Drejtoresha e OJQ-së “SHE ERA”, Mirlinda Kusari Purrini dhe kompania e përzgjedhur kanë nënshkruar kontratën për realizimin e aktivitetit “Rregullimi i infrastrukturës së lumit Llukac” në kuadër të projektit për ujë të pastër në Gjakovë dhe Kukës.
“Jam i lumtur që sot është nënshkruar kontrata për një projekt tjetër jashtëzakonisht të rëndësishëm mes organizatës “SHE ERA” dhe kompanisë përfituese që është ArcProject për fillimin e punëve në rehabilitimin e shtratit të lumit Llukac. Në vitet që do të vijnë ose do ta buxhetojmë vet vazhdimin për rehabilitimin e lumit Trakaniq (Llukac) ose do të sigurojmë fonde përmes donatorëve”, tha mes tjerash kryetari i komunës, Ardian Gjini.
Ky projekt implementohet në kuadër të Programit Ndërkufitar IPA II Shqipëri dhe Kosovë me partneritet në mes të Komunës së Gjakovës, Bashkisë së Kukësit, OJQ-së “SHE ERA” dhe OJQ-së “ACER”.
Realizimi i tij do të zgjasë tri vite dhe vlera totale financiare është 1,411,162.83€ nga të cilat Komuna e Gjakovës do të participojë 134,000.00€.
