Në Gjakovë u zhvillua takimi me Këshillin Kombëtar për Parandalimin dhe Sanksionimin e Dhunës dhe Dukurive Negative në Ngjarjet Sportive, në kuadër të planit të punës për vitin 2026.
Gjatë takimit u diskutua për parandalimin e dhunës në ngjarjet sportive, me fokus në qartësimin e përgjegjësive ligjore të institucioneve përkatëse dhe rolin koordinues të Këshillit në adresimin e rasteve tek organet kompetente.
Në takim mori pjesë edhe Nënkryetari i Komunës së Gjakovës, Flamur Fetahaj, ndërsa pjesëmarrësit theksuan rëndësinë e bashkëpunimit të strukturuar ndërinstitucional dhe nevojën për reagim të koordinuar në trajtimin e rasteve që lidhen me sigurinë në aktivitetet sportive. Po ashtu, u evidentuan edhe sfidat dhe boshllëqet ekzistuese që kërkojnë adresim dhe përmirësim të mëtejshëm.
Me këtë rast, Nënkryetari Fetahaj konfirmoi mbështetjen e plotë të Komunës së Gjakovës për funksionimin efektiv të këtij mekanizmi, duke theksuar se siguria publike dhe promovimi i kulturës sportive janë prioritete të rëndësishme për institucionet lokale.
Takimi shërbeu gjithashtu si platformë për shkëmbimin e përvojave dhe forcimin e bashkëpunimit ndërmjet institucioneve përgjegjëse, me synim krijimin e një mjedisi më të sigurt dhe më pozitiv në ngjarjet sportive.
