Kuvendi komunal i Gjakovës sot ka mbajtur mbledhje të jashtëzakonshme, në të cilën është diskutuar mbi dhunën në familje në komunën tonë.
Sipas kryesuesit të Kuvendit Komunal, Anton Shala, kjo mbledhje është mbajtur me pajtueshmërinë e plotë të të gjitha grupeve të subjekteve politike, ndërsa është vendosur që dita e mbajtjes së kësaj seance të jetë pikërisht 8 Marsi, festa ndërkombëtare e gruas.
Pas deklarimeve të përfaqësuesve të të gjitha subjekteve politike si dhe të kryetarit të komunës Ardian Gjini, Kuvendi i Komunës së Gjakovës ka dalë me një deklaratë dhe me disa rekomandime, përmes së cilave synohet që t’i ipet një fokusim më i madh luftës kundër dhunës në familje.
Në pajtueshmëri të plotë të të gjitha grupeve politike, në mesin e rekomandimeve të dala nga kjo seancë kanë qenë edhe rekomandimet për më shumë projekte vetëdijësuese, më shumë vëmendje për fëmijët gjatë procesit mësimor, më shumë vigjilencë nga organet e rendit e të tjera.
