Me nderime të larta dhe respekt maksimal është varrosur sot kryeprokurori i Prokurorisë Themelore të Gjakovës Ali Selimaj, aktivist i hershëm për mbrojtjen e lirive dhe të drejtave të njeriut, aktivist në aktivitete kombëtare dhe mbajtës i disa funksioneve udhëheqëse për disa mandate në pushtetin lokal në Gjakovë.
Në ceremoninë lamtumirëse, të mbajtur nën patronatin e kryetarit të komunës së Gjakovës Ardian Gjini, mes tjerash u vlerësua lartë humanizmi, atdhedashuria dhe kontributi i pashembullt i Ali Selimajt.
Në fjalën e tij, kryetari Gjini mes tjerash ka thënë se Ali Selimaj me përkushtimin dhe profesionalizmin e tij gjithmonë ka qenë shembull për bashkëpunëtorët, prandaj edhe humbja e tij e hershme është goditje e rëndë jo vetëm për familjen por për të gjithë ata që e kanë njohur dhe kanë bashkpunuar me të ndjerin.
Në emër të kolegëve të të ndjerit ka folur prokurori i Prokurorisë Themelore të Gjakovës Ramiz Buzhala, ndërsa me një telegram ngushllimi të ndjerin Ali Selimaj e ka kujtuar dhe nderuar edhe Kryeprokurori i Kosovës Aleksandër Lumezi.
Në emër të familjes ka folur i biri i Ali Selimajt, Meshari, i cili i ka felënderuar të gjithë ata që po e ndajnë dhimbjen me familjen Selimaj.
Para ceremonisë së varrimit, para arkivolit me trupin e të ndjerit janë bërë homazhe dhe janë vendosur kurora me lule.
