Me nderime dhe respekt të lartë, i’u dha lamtumira e fundit bashkëqytetarit tonë, Gurakuq Dobruna, veteran i UÇK-së, artist shumëdimensional dhe së fundmi edhe Kryetar i subjektit politik “Alternativa” në Gjakovë.
Në ceremoninë e varrimit, të pranishëm ishin familjarë dhe miq të të ndjerit, Kryetari i Komunës, Ardian Gjini, zyrtarë komunalë dhe të institucioneve qendrore, pjesëtarë të partive politike, deputetë të Kuvendit të Kosovës, veteranë të UÇK-së, pjesëtarë të komunitetit artistik dhe qytetarë të Gjakovës.
Gjatë fjalimit para të pranishmëve, Kryetari Gjini, ka vlerësuar lartë kontributin e atdhetarit Gurakuq Dobruna, gjatë luftës së fundit për lirinë e Kosovës por edhe pas luftës, duke punuar ndershëm përmes angazhimeve të ndryshme në fushën e artit, dizajnit dhe politikës. “Gurakuqi do të mbetet gjithmonë në mendjet dhe zemrat tona si shembulli më i mirë i një njeriu human, artisti kreativ dhe një patrioti i cili tërë jetën u angazhua për të mirën e vendit, pa kërkuar asgjë në këmbim” u shpreh ndër të tjera Kryetari Gjini.
Në mbledhjen komemorative, folën edhe Lekë Dobruna, në emër të familjes, Kryetarja e Alternativës, Mimoza Kusari-Lila, deputetja e Vetëvendosjes, Arbërie Nagavci dhe në emër të komunitetit artistik, Gemb Xërxa.
Humbja e parakohshme e Gurakuq Dobrunës në moshën 53 vjeçare, është humbje për të gjithë Gjakovën. Do ta kujtojmë gjithmonë për urtësinë, ndershmërinë, patriotizmin dhe ndërgjegjen e lartë qytetare që e shprehte përmes veprave artistike të cilat do të jetojnë gjithmonë me ne.
