Është mbajtur sot takimi i radhës i Komitetit për Komunitete në komunën e Gjakovës.
Sipas rendit të ditës, para anëtarëve të këtij komuniteti ka raportuar përfaqësuesja e drejtorisë komunale të Arsimit Flutur Këpuska, e cila ka treguar për procesin e regjistrimit nëpër shkolla të nxënësve nga komunitetet jo – shumicë si dhe vijueshmërinë e mësimit të këtyre nxënësve.
Një raport para anëtarëve të Komitetit për Komunitete e ka dhënë edhe udhëheqësi i Njësisë për Menaxhimin e Burimeve Njerëzore, Kushtrim Brahimaj, i cili ka bërë të ditur se kjo njësi në vazhdimësi ka kujdes të veçantë për pjesëtarët e komuniteve jo – shumicë, qoftë gjatë procesit të rekrutimit, qoftë për stafin ekzistues komunal, pjesë e këtyre komuniteteve.
Në këtë takim është diskutuar edhe për gjendjen e ambientit dhe mbeturinave në lagjet komunitare, si dhe është diskutuar për çështjet e kthimit dhe strehimit të qytetarëve nga komunitetet jo – shumicë.
