Është mbajtur mbledhja e shtatë për këtë vit e Komitetit për Komunitete të Kuvendit të Komunës.
Fillimisht, Kryesuesi i këtij Komiteti Ergit Qeli, ka prezantuar shqyrtimin e procesverbalit të mbledhjes së kaluar.
Më pas, Drejtori për Buxhet dhe Financa Durim Halilaj, ka dhënë informatë lidhur me financimin e projekteve në lagjet ku jetojnë pjesëtarë të komuniteteve jo-shumicë. Ndër të tjera, ai ka përmendur dëgjimet buxhetore të cilat mbahen me këto komunitete, kërkesat e të cilave merren parasysh nga institucioni i Komunës së Gjakovës.
Udhëheqësi i Zyrës Komunale për Komunitete dhe Kthim Armend Behluli, ka dhënë raportin e punës të kësaj zyre. Mes tjerash, ai ka informuar për hapjen e klasës për fëmijë në nivelin parashkollor në Qendrën për Komunitete “Ali Ibra”, projekt ky i realizuar nga OJQ “Prosperiteti” dhe Zyra Komunale për Komunitete dhe Kthim në kuadër të institucionit të Komunës së Gjakovës, përmes programit të përbashkët ROMACTED II të Bashkimit Evropian dhe Këshillit të Evropës.
