Është mbajtur sot debati i dytë për vitin 2021 e kryetarit të komunës së Gjakovës Ardian Gjini me qytetarët.
Gjatë këtij takimi, hapësirën më të madhe të kohës e kanë pasur vet qytetarët, të cilët para kryetarit Gjini kanë shfaqur të gjitha kërkesat, shqetësimet, por edhe projektet e idetë konkrete.
E në të gjitha këto adresime, qytetarët kanë marrë përgjigje një nga një nga kryetari Gjini, qoftë në kuptimin e informacionit për gjendjen reale, qoftë në kuptimin e planifikimit për realizimin e këtyre kërkesave. Nga ana tjetër, në adresimin e tij para qytetarëve, kryetari Gjini ka përmendur shkurtimisht investimet e realizuara deri me tani, ndërsa është fokusuar edhe tek planet dhe projektet afatshkurtra dhe afatgjata të komunës, e theksi i veçantë në këtë drejtim është vendosur tek lirimi dhe mirëmbajtja e hapësirave publike, trajtimi i ujërave të zeza, rregullimi i kanalizimeve dhe menaxhimi i mbeturinave.
Për realizimin e të gjitha këtyre projekteve, kryetari Gjini ka kërkuar edhe mirëkuptimin dhe bashkëpunimin e qytetarëve, për faktin se të gjitha projektet janë lehtë të realizueshme kur ekziston bashkëpunim i shëndoshë dhe i sinqertë në mes të qytetarëve dhe institucioneve lokale.
