Me 21 vota për, 10 kundër dhe asnjë abstenim, Kuvendi i Komunës së Gjakovës ka miratuar Buxhetin Komunal për vitin 2027.
Miratimi i buxhetit ishte pika kryesore e rendit të ditës në mbledhjen e tetë të rregullt të Kuvendit të Komunës, të udhëhequr nga kryesuesi Shefqet Shehu, dhe çështja që nxiti më së shumti diskutime ndërmjet anëtarëve të Kuvendit.
Buxheti u prezantua nga drejtori për Buxhet dhe Financa, Durim Halilaj, i cili theksoi se ky dokument është rezultat i një pune intensive disamujore, të realizuar në bashkëpunim me të gjitha palët e përfshira, përmes konsultimeve dhe diskutimeve të vazhdueshme.
Për buxhetin foli edhe kryetari i Komunës, Ardian Gjini, i cili e cilësoi atë si buxhet zhvillimor për Gjakovën, duke theksuar rritjen e të hyrave vetanake, investimeve kapitale dhe nivelin e lartë të shpenzimit të buxhetit si tregues të performancës së Komunës.
Buxheti i Komunës së Gjakovës për vitin 2027 është në vlerë të përgjithshme prej 43,715,897 euro, i ndarë në këto kategori:
- Paga dhe mëditje: 23,074,799 euro
- Investime kapitale: 13,200,645 euro
- Mallra dhe shërbime: 4,700,000 euro
- Subvencione: 1,600,053 euro
- Shpenzime komunale: 1,140,400 euro
