Kryetari i komunës së Gjakovës Ardian Gjini e ka përmbyllur në tërësi ciklin e vizitave nëpër objektet shëndetësore të shëndetit primar në komunën e Gjakovës.
Pasi ka vizituar të gjithë objektet nëpër fshatra, kryetari Gjini sot ka vizituar edhe objektet në brendësi të qytetit, me ç’rast ka takuar nga afër dhe ka bashkëbiseduar me stafin shëndetësor që punon në këto qendra.
Kryetari Gjini me bashkëpunëtorët e tij ka vizituar QMF-të në Orize, atë tek Shkolla “Emin Duraku”, QMF-në “Ereniku”, atë në lagjen Dardania si dhe e ka përmbyllur këtë cikël të vizitave në Qendrën Kryesore të Mjeksisë Familjare QKMF.
Në të gjitha këto vizita, kryetari Gjini është interesuar për kushtet e punës me të cilat operojnë punëtorët shëndetësor, ndërsa ka shprehur gadishëmrinë e tij dhe të qeverisjes lokale për angazhim më të shtuar për ngritjen e cilësisë së shërbimeve shëndetësore dhe krijimin e kushteve më të mira për punëtorët shëndëtësor.
