Në kuadër të takimeve të rregullta me Kryetar Komunash, sot ambasadorja Kroate, Marija Kapitanoviq ka zhvilluar takim me kryetarin e Komunës së Gjakovës, Ardian Gjini.
“Ambasadorja përfaqëson një vend shumë mik të Kosovës. Ne kemi biseduar për të gjitha mënyrat e mundshme të bashkëpunimit ekonomik e kulturor, duke pasur parasysh që kemi shumë bashkëqytetarë tanë të cilët jetojnë në Kroaci”, u shpreh kryetari Gjini.
Për mënyra të bashkëpunimit ka folur gjithashtu edhe ambasadorja Kroate e cila ka thënë që: “Kroacia është një vend në të cilin jetojnë shumë kosovarë. Ne duam të krijojmë ura bashkëpunimi për zhvillimin e bizneseve të vogla, ngritjes së infrastrukturës, shkëmbimeve kulturore”.
Frytet e takimit të sotëm shumë shpejtë do të konkretizohen me projekte të të dyja vendeve.
