Kfori Italian në Kosovë ka dorzuar një donacion në vlerë prej 10 mijë eurosh për Qendrën Kryesore të Mjekësisë Familjare në komunën e Gjakovës. Bëhet fjalë për dy pajisje – autokllavë të cilat përdorën për sterilizim e të cilat kanë ardhur si rrjedhojë e kërkesës nga Drejtoria për Shëndetësi dhe Mirëqenie Sociale.
Të pranishëm në ceremoninë e pranim-dorëzimit ishin edhe Drejtoresha për Shëndetësi dhe Mirëqenie Sociale Adelina Shehu – Kola dhe Komandanti i Kforit Italian në Kosovë Mario Bozzi.
Në fjalën e saj hyrëse, drejtoresha Shehu – Kola është shprehur mirënjohëse për këtë donacion të vlefshëm dhe bashkëpunimin e vazhdueshëm të Kforit Italian me Komunën e Gjakovës, Drejtorinë për Shëndetësi dhe Mirëqenie Sociale.
Gjatë kësaj ngjarjeje, Komandanti Bozzi dhe Drejtoresha Shehu – Kola janë shprehur të gatshëm për vazhdim të bashkëpunimit në mes të këtyre dy institucioneve. Ndërkohë drejtoresha e DSHMS-së i ka dorëzuar një mirënjohje Komandantit të KFOR-it në shenjë respekti.
