Kanë filluar punimet për fazën e dytë të rehabilitimit të lumit Llukac dhe njëkohësisht ndërtimin e shëtitores përreth tij.
Ky projekt i gjatë 640 metra me vlerë financiare 387 mijë euro, do të marrë formën e tij brenda këtij viti.
Gjatë nisjes së këtij investimi, Kryetari i Komunës Ardian Gjini u shpreh se ata që e kanë parë projektin e lumit Krena e dinë që pas një pune të madhe, vjen diçka e jashtëzakonshme. “Ideja e këtij investimi është lidhja e lumit Llukac me lumenjtë Krena dhe Erenik si dhe rrugën “Bujar Roka”. Një projekt madhështor si ky do t’i dhurojë hijeshi Gjakovës dhe padyshim qytetarët tanë dhe të gjithë ata që vizitojnë komunën tonë, do të kenë edhe një vend rekreativ për të kaluar një kohë kualitative” tha ndër të tjera Kryetari Gjini.
Kët vit finalizohen faza e parë dhe e dytë e këtij projekti, konkretisht nga dalja për Prizren deri tek hapësira prapa Sallës Sportive “Shani Nushi”. Faza e parë është në kuadër të Programit Ndërkufitar IPA II Shqipëri dhe Kosovë me partneritet në mes të Komunës së Gjakovës, Bashkisë së Kukësit, OJQ-së “SHE ERA” dhe OJQ-së “ACER”.
