Qendra BONEVET në Gjakovë vazhdon të dëshmojë përkushtimin e saj në fuqizimin e të rinjve dhe zhvillimin e kreativitetit, duke u shndërruar në një hapësirë të veçantë inovacioni dhe mësimi për fëmijët dhe të rinjtë e qytetit.
Në prani të shumë mysafirëve, mes tyre përfaqësues të Komunës së Gjakovës, kryesuesi i Kuvendit Komunal Shefqet Shehu, drejtori i Arsimit Hysen Brahimaj dhe të ftuar të tjerë, u bë prezantimi i tri projekteve të zhvilluara me Inteligjencë Artificiale nga anëtarët vjetorë të BONEVET Gjakova.
Projektet e prezantuara përfshijnë:
- “Sistemi i trafikut të mençur për efiçiencë ambientaliste”;
- “Detektimi i bullizmit kibernetik tek të rinjtë dhe mbështetja përmes Chatbot-it”;
- “Sistemi i Inteligjencës Artificiale për edukimin e të rinjve në zonat e margjinalizuara”.
Këto projekte pasqyrojnë punën, angazhimin dhe vizionin e të rinjve të Gjakovës për përdorimin e teknologjisë në adresimin e sfidave konkrete shoqërore, duke dëshmuar potencialin e tyre për të krijuar zgjidhje inovative me ndikim pozitiv në komunitet.
Komuna e Gjakovës vlerëson lart angazhimin e BONEVET dhe të rinjve pjesëmarrës, të cilët po kontribuojnë në ndërtimin e një të ardhmeje më inovative dhe më të zhvilluar për qytetin tonë.
