Nën organizimin e Institucionit të Avokatit të Popullit dhe me mbështetje nga OSBE Misioni në Kosovë, është mbajtur tryezë diskutimi “Fuqizimi i bashkëpunimit ndër-institucional në promovimin e të drejtave të njeriut dhe qeverisjes së mirë”.
Në mesin e kryetarëve të komunave të Kosovës, i ftuar ishte edhe Kryetari i Komunës sonë Ardian Gjini. Në fjalën e tij, ndër të tjera, ai tha se nëse e krahasojmë periudhën në të cilën flasim me atë para 25 viteve, Kosova ka ecë dukshëm në çështjen e respektimit të të drejtave të njeriut. “Para 25 viteve, në Kosovë as nuk janë përmendur të drejtat e njeriut. Në periudhën që po flasim, vërejmë një përparim të dukshëm në këtë aspekt. Megjithatë, ne si institucione bashkë me OJQ-të, Avokatin e Popullit dhe të gjithë akterët relevantë, duhet të vazhdojmë të punojmë në këtë drejtim. Unë dua të falënderoj të gjitha institucionet dhe organizatat jo-qeveritare për punën e jashtëzakonshme, me qëllim të respektimit të të drejtave të njeriut dhe i ftoj që bashkëpunimi ynë të vazhdojë edhe në të ardhmen” u shpreh Kryetari Gjini.
