Në ambientet e Bibliotekës së Qytetit të Gjakovës, është promovuar projekti “Memorie dhe Traumë: Kujtesa e luftës 1998- 1999 në letërsinë shqipe në Kosovë” i autores Blerina Rugova Gaxha, ku i pranishëm ishte edhe Kryetari i Gjakovës Ardian Gjini dhe Drejtoresha e Kulturës, Rinisë dhe Sportit, Adea Roka.
Me qëllim që historia e dhimbshme e luftës në Kosovë, mos të lihet në harresë, por edhe t’iu rrëfehet brezave të rinj, autorja Blerina Rugova Gaxha solli copëza të historisë përmes librit monografik “Memorie dhe Traumë”, filmit poetik “ Bijë lufte” dhe ekspozitës “Rojtarë të memories”.
Paneli i përbërë nga gazetari dhe publicisti Halil Matoshi, profesori Muhamet Rogova dhe Profesoresha Sidorela Doli Kryeziu, e vlerësuan lartë projektin e autores, duke e cilësuar si një ndër veprat më të mëdha të kujtesës letrare në Kosovën e pasluftës.
Ndërsa, autorja Blerina Rogova Gaxha tha se projekti pasqyron anën shpirtërore dhe emocionale të viktimave të luftës si dhe tronditjen që i’u shkaktoi lufta popullit tonë.
