Në Gjakovë u promovuan dy botimet më të reja të autorit Ragip Ballata: “Shkolla ‘Skënderbeg’ e Gjakovës (1915–1918)” dhe “Tufë proverbash të zgjedhura”.
Vepra “Shkolla ‘Skënderbeg’ e Gjakovës (1915–1918)” sjell një hulumtim të dokumentuar mbi historinë e shkollës së parë publike shqipe në Kosovë gjatë Luftës së Parë Botërore, ndërsa libri “Tufë proverbash të zgjedhura” përmbledh urtësinë popullore dhe mendimin filozofik të sistemuar në 37 fusha të jetës.
Në promovim folën kryetari i Shoqatës “Jakova”, Ruzhdi Sefa, dhe recensenti i veprës, prof. dr. Shefqet Canhasi, të cilët vlerësuan kontributin e autorit në hulumtimin, ruajtjen dhe promovimin e trashëgimisë historike, arsimore dhe kulturore.
Ky promovim ishte një aktivitet që nxori në pah rëndësinë e botimeve që pasurojnë kujtesën historike dhe trashëgiminë kulturore të Gjakovës dhe Kosovës.
