Përkujtimi i Masakrës së Mejës rikthen në kujtesë një nga plagët më të rënda të historisë së Kosovës. Njëzet e shtatë vjet më parë, në këtë vend u vranë mizorisht 376 qytetarë të pafajshëm, duke lënë pas dhimbje të pashlyeshme për familjet e tyre dhe për mbarë popullin e Kosovës.
Kjo tragjedi mbetet dëshmi e vuajtjeve të mëdha që përjetoi populli ynë gjatë luftës, por njëkohësisht edhe simbol i qëndresës dhe përkushtimit për liri e drejtësi.
Me këtë rast u përkujtuan edhe dëshmorët dhe martirët e fshatit Skivjan, të cilët me sakrificën e tyre dhanë kontribut të çmuar për lirinë dhe pavarësinë e Kosovës. Vepra dhe kujtimi i tyre mbeten pjesë e pandashme e historisë sonë dhe frymëzim për brezat që vijnë.
Nderimi i të rënëve dhe kujdesi për ruajtjen e kujtesës kolektive janë obligim i përhershëm institucional dhe shoqëror, në mënyrë që sakrifica e tyre të mos harrohet kurrë.
