Edhe në komunën e Gjakovës ka nisur sot aksioni “Ta pastrojmë Kosovën”, aksion i cili, mbështetur nga kryeministri i Kosovës Ramush Haradinaj, ka nisur në të gjitha komunat e Kosovës.
Në hapje të këtij aksioni ka marrë pjesë edhe kryetari i komunës së Gjakovës Ardian Gjini i cili ka thënë se gjendja e ambientit në të cilën ndodhet vendi ynë ka nevojë të madhe për aksione të tilla. Kryetari Gjini ka ftuar të gjithë qytetarët që të jenë aktiv gjatë kësaj fushate të pastrimit, ndërsa ka garantuar se komuna do të angazhohet që në të ardhmen në Gjakovë të jetë një gjendje shumë me e mirë e ambientit.
Ndryshe, aksioni i nisur sot, do të përmbyllet me 15 dhjetor, ndërsa synohet pastrimi i gjithmbarshëm i tërë territorit të komunës së Gjakovës.
Përveç komunës, në këtë aksion janë të përfshirë edhe shumë institucione e organizata tjera joqeveritare, të cilët janë shpërndarë në pjesë të ndryshme të qytetit dhe fshatrave të komunës së Gjakovës.
