Në kuadër të shënimit të Ditës Ndërkombëtare të Muzeve, Muzeu Etnografik i Gjakovës organizoi Kuizin e Trashëgimisë Kulturore me temën “Muzetë që bashkojnë një botë të ndarë”.
Aktiviteti mblodhi nxënës nga shkolla të ndryshme të komunës, të cilët përmes njohurive, kreativitetit dhe punës ekipore promovuan vlerat e trashëgimisë kulturore, historisë dhe identitetit tonë të përbashkët.
E pranishme në këtë aktivitet ishte edhe drejtoresha për Kulturë, Rini dhe Sport, Adea Roka Pylla, e cila theksoi rëndësinë e aktiviteteve edukative dhe kulturore që nxisin interesimin e të rinjve për ruajtjen dhe promovimin e trashëgimisë kulturore.
Pas një gare të zhvilluar në frymë konkurrence dhe bashkëpunimi, fituese e Kuizit të Trashëgimisë Kulturore u shpall Shkolla “Emin Duraku”, e cila u dallua për nivelin e njohurive dhe angazhimin gjatë aktivitetit.
Në ceremoninë e ndarjes së çmimeve ishte i pranishëm edhe drejtori për Arsim, Hysen Brahimaj, i cili uroi nxënësit pjesëmarrës dhe bëri shpërndarjen e çmimeve kryesore për ekipet më të suksesshme.
Përmes aktiviteteve të tilla, Muzeu Etnografik i Gjakovës vazhdon të promovojë rëndësinë e trashëgimisë kulturore dhe të inkurajojë përfshirjen aktive të brezave të rinj në ruajtjen dhe kultivimin e saj.
