Eshtë mbajtur mbledhja inauguruese e Kuvendit të Komunës së Gjakovës, gjatë së cilës u bë betimi i anëtarëve të rinj të Kuvendit, si dhe betimi i Kryetarit të Komunës, z. Ardian Gjini.
Në këtë mbledhje u zgjodh edhe Kryesuesi i Kuvendit Komunal. Me votim të fshehtë, nga 35 asambleistë të pranishëm, 24 votuan pro për zgjedhjen e z. Shefqet Shehu në këtë pozitë.
Në fjalën e tij, Kryetari i Komunës, Ardian Gjini, u uroi suksese të gjithë të zgjedhurve për mandatin e ri, duke theksuar se Komuna e Gjakovës do të vazhdojë t’i kryejë detyrat e saj me përkushtim, profesionalizëm, nder dhe përgjegjësi, ashtu si edhe në të kaluarën.
Ndërkaq, Kryesuesi i sapozgjedhur i Kuvendit Komunal, z. Shefqet Shehu, falënderoi asambleistët për besimin e dhënë dhe u zotua se përkushtimi i tij në ushtrimin e përgjegjësive të besuara do të jetë maksimal.
Komuna e Gjakovës u uron suksese të gjithë të zgjedhurve në ushtrimin e përgjegjësive të tyre dhe riafirmon përkushtimin për bashkëpunim dhe transparencë në shërbim të qytetarëve.
