Në Komunën e Gjakovës është mbajtur mbledhja e rregullt e Mekanizmit Koordinues Komunal Kundër Dhunës në Familje. Nga tani e tutje, mbledhjet e këtij mekanizmi do të kryesohen nga Kryetari i Komunës, Ardian Gjini, ndërsa Udhëheqësja e Sektorit për të Drejtat e Njeriut, Lumnije Shllaku, do të jetë përgjegjëse për Sekretarinë e Mekanizmit Koordinues Lokal.
Ky ndryshim u bë pas miratimit të Rregullores Nr. 01/2025 për Mekanizmin Koordinues Lokal për Mbrojtje nga Dhuna në Familje, Dhuna ndaj Grave dhe Dhuna me Bazë Gjinore, e cila mbështetet në Ligjin Nr. 08/L-185 për Parandalimin dhe Mbrojtjen nga Dhuna në Familje, Dhuna ndaj Grave dhe Dhuna me Bazë Gjinore.
Gjatë mbledhjes, Kryetari Gjini shprehu mirënjohjen e tij ndaj anëtarëve të mekanizmit për angazhimin në luftimin e dhunës në familje dhe theksoi gatishmërinë për bashkëpunim të ndërsjellë në aktivitetet e ardhshme. Anëtarët e Mekanizmit Koordinues raportuan për punën e realizuar në institucionet që përfaqësojnë, duke veçuar aktivitetet që do të zhvillohen gjatë 16 ditëve të aktivizmit kundër dhunës në baza gjinore.
