Sot është mbajtur mbledhja e bordit të drejtorëve, ku janë diskutuar tetë pika të rendit të ditës, që kishin të bëjnë me shqyrtimin e kërkesës për sigurimin e një lokacioni për trajtimin e qenve dhe maceve endacake; menaxhimi i mbeturinave në zonën urbane dhe rurale në komunën e Gjakovës; përgatitja e projektit për lumin “Krena”. Gjatë mbledhjes janë bërë raportime nga drejtoritë për ecurinë e implementimit për parkun e biznesit, projektin për ngrohtoren e qytetit dhe projektin për impiantin e ujërave të zeza.
Temë kryesore e kësaj mbledhje ishte menaxhimi i mbeturinave në zonën urbane dhe rurale në Komunën e Gjakovës. Situata e mbeturinave në hapësirat publike është vlerësuar si mjaft e rëndë, dhe për këtë çështje kryetari i komunës Ardian Gjini, ka kërkuar një mobilizim të përgjithshëm të institucioneve përkatëse, më qëllim që qyteti dhe hapësirat publike të jenë të pastra. Gjithashtu, është kërkuar që të aplikohen edhe masat ndëshkuese për qytetarët e pandërgjegjshëm që hedhin mbeturina në vende publike.
