Kryetari i Komunës së Gjakovës, z. Ardian Gjini, ka vizituar së fundmi zyrën e hapur për projektin e Rindërtimit të Kadastrit, i cili po zbatohet nga operatori ekonomik “GEOCAD”. Gjatë kësaj vizite, kryetari u njoftua nga zyrtarët e kompanisë për ecurinë e punës në katër zona të komunës: Gjakovë Jashtë Qytetit (Blloku i Ri, Carrapatok), Gjakovë Qytet (pjesë e Çabratit), Jahoc dhe Zidi i Sadik Agës.
Ky projekt ka një rëndësi të veçantë për qytetarët, pasi përfshin:
- Rregullimin e trashëgimisë pronësore,
- Legalizimin e ndërtimeve,
- Zgjidhjen e kontratave joformale,
- Ndarjen e pronës sipas gjendjes faktike.
Të gjitha këto shërbime ofrohen pa pagesë, duke krijuar një mundësi të madhe për banorët që të rregullojnë çështjet pronësore në mënyrë të thjeshtë, të shpejtë dhe transparente.
Komuna e Gjakovës fton të gjithë banorët e zonave të përfshira që të vizitojnë zyrën e projektit për t’u informuar më hollësisht mbi hapat që duhet të ndërmarrin.
