Komuna e Gjakovës pati nderin të marrë pjesë në aktivitetin tradicional “Java e Gruas”, të organizuar nga Instituti Kombëtar Demokratik (NDI), i cili këtë vit mblodhi gra lidere, përfaqësuese të institucioneve dhe aktiviste nga e gjithë Kosova për të diskutuar mbi sfidat dhe mundësitë që gratë përballin në politikë dhe në jetën shoqërore.
Kryetari i Komunës Ardian Gjini, së bashku me Kryesuesen e Kuvendit Komunal Arbenesha Kuqi, Drejtoreshën për Kulturë, Rini dhe Sport Adea Roka-Pylla, si dhe zyrtare të tjera komunale, morën pjesë aktive në diskutimet e zhvilluara krahas ambasadores Nancy Soderberg, drejtoreshë e lartë në NDI.
Në fjalën e tij, kryetari Gjini theksoi rëndësinë e përfshirjes së grave në vendimmarrje, duke inkurajuar një qasje që shkon përtej kuotave gjinore – drejt një pjesëmarrjeje të barabartë, të sinqertë dhe të fuqishme në ndërtimin e një shoqërie më të drejtë dhe më solidarizuese.
Komuna e Gjakovës mbetet e përkushtuar në promovimin e barazisë gjinore dhe fuqizimin e rolit të gruas në të gjitha nivelet e jetës institucionale dhe shoqërore.
