Në kuadër të projektit “Just Energy Transitions in Practice”, Komuna e Gjakovës u përfaqësua në një vizitë studimore të organizuar në Janinë të Greqisë nga Drejtoresha për Kulturë, Rini dhe Sport, Adea Roka Pylla, dhe Këshilltarja Politike, Edona Cana Lipoveci.
Projekti, i zbatuar nga Milieukontakt Albania dhe i mbështetur nga Open Society Foundations – Western Balkans, mblodhi përfaqësues institucionalë dhe ekspertë nga vende të ndryshme të rajonit, duke ofruar një platformë për shkëmbimin e përvojave dhe praktikave më të mira në fushën e energjisë së ripërtëritshme dhe zhvillimit të qëndrueshëm.
Gjatë vizitës, pjesëmarrëset patën mundësinë të njihen nga afër me modele të suksesshme të përdorimit të energjisë solare dhe burimeve të tjera të ripërtëritshme, si dhe të diskutojnë me ekspertë ndërkombëtarë mbi sfidat dhe mundësitë e tranzicionit energjetik në nivel lokal.
Kjo përvojë kontribuon në forcimin e kapaciteteve institucionale të Komunës së Gjakovës dhe promovimin e zgjidhjeve të qëndrueshme që mbështesin mbrojtjen e mjedisit, efikasitetin energjetik dhe zhvillimin afatgjatë të komunitetit.
Si shenjë mirënjohjeje dhe promovimi të vlerave kulturore e krijuese të qytetit, gjatë vizitës u dhuruan punime artistike të realizuara nga fëmijët e Gjakovës.
