Kryetari i Komunës së Gjakovës, Ardian Gjini, së bashku me bashkëpunëtorë komunal, mori pjesë në ceremoninë inauguruese të Kishës Protestante “Rilindja” në Gjakovë.
Gjatë ceremonisë, kryetari Gjini theksoi se çdo punë e bërë në shërbim të komunitetit përbën një arritje të rëndësishme dhe përgëzoi komunitetin protestant për hapjen e këtij objekti të ri të kultit, të cilin e cilësoi si vend besimi dhe shprese.
Ndërtimi i kishës në Firzë u realizua falë donacionit të organizatës holandeze New Day Impact. Pastori Jeton Sokoli shprehu mirënjohjen e tij ndaj donatorëve dhe Komunës së Gjakovës, duke theksuar se kjo kishë do të jetë një qendër për të gjithë dhe një vend mikpritës që u jep njerëzve dinjitetin që meritojnë.
Drejtori i New Day Impact, Paul de Lange, u shpreh se ky projekt është rezultat i një bashkëpunimi të ngushtë dhe se organizata është e lumtur që ka kontribuar në realizimin e një vepre të vlefshme për komunitetin.
