Gjakova po përmirëson infrastrukturën rrugore me një projekt të rëndësishëm që do të sjellë përfitime të shumta për banorët dhe vizitorët. Kanë nisur punimet për hapjen dhe asfaltimin e rrugës së Radoniqit, një arterie kyçe për lidhjen e komunitetit dhe promovimin e zonave turistike përreth.
Rruga e Radoniqit, me gjatësi prej 1.4 kilometrash dhe gjerësi 5 metrash, do të lehtësojë qasjen në zonën e Dushkajës dhe Liqenit të Radoniqit, vende të njohura për bukurinë natyrore dhe potencialin e tyre turistik.
Projekti, i cili pritet të përfundojë brenda një viti, është financuar me rreth 145 mijë euro nga buxheti komunal i Gjakovës. Ky investim do të rrisë cilësinë e jetës së banorëve dhe do të kontribuojë në zhvillimin ekonomik dhe turistik të rajonit.
Kryetari i Komunës, Ardian Gjini, u shpreh optimist për impaktin e këtij projekti dhe uroi që puna të ecë shpejt dhe sipas planit.
