Komuna e Gjakovës ka organizuar sot sesion informues me operatorët ekonomikë për projektin e qarkores së qytetit të Gjakovës, Lotit të parë, projekt ky i cili pritet të nisë gjatë këtyre ditëve.
Krahas prezantimit profesional të bërë nga zyrtarët e drejtorisë së Shërbimeve Publike dhe ata të zyrës së Prokurimit, në këtë takim ka marrë pjesë edhe kryetari i komunës së Gjakovës Ardian Gjini, i cili në fjalën e tij ka thënë se ky është projekt i përbashkët e komunës së Gjakovës dhe ministrisë së Infrastrukturës dhe është tenderi më i madh që është hapur ndonjëherë nga komuna e Gjakovës. Ai ka shtuar se ky bashkëpunim nuk do të përmbyllet me kaq, sepse projektet infrastrukturore në komunën e Gjakovës do të vazhdojnë edhe në të ardhmen.
Loti i parë i këtij projekti përfshinë segmentin nga lokacioni “Ura e Nakarades”, deri tek rreth rrotullimi në kryqëzimin e rrugëve “Tirana” dhe “Bujar Roka”, për të vazhduar më tej me lotet e ardhshme, që përfshijnë segmentin në mes të lokacioneve “Ura e Nakarades” dhe “Pika e Zeze” si dhe vazhdimin e rrugës “Bujar Roka” në drejtim të Shkugëzit dhe Rekës së Keqe.
