Është mbajtur mbledhja e parë për këtë vit e Mekanizmit Komunal Kundër Dhunës në Familje në Komunën e Gjakovës, me pjesëmarrjen e përfaqësuesve të institucioneve dhe mekanizmave relevantë që veprojnë në parandalimin dhe trajtimin e rasteve të dhunës në familje.
Gjatë takimit u bë prezantimi i anëtarëve të mekanizmit, ndërsa u diskutua për koordinimin e aktiviteteve, sfidat aktuale dhe përcaktimin e hapave të ardhshëm të bashkëpunimit ndërinstitucional.
Kryetari i Komunës së Gjakovës, Ardian Gjini, falënderoi anëtarët e mekanizmit dhe institucionet që ata përfaqësojnë për angazhimin e tyre, duke theksuar rëndësinë e bashkëpunimit të vazhdueshëm në luftën kundër dhunës në familje dhe në ofrimin e mbështetjes për viktimat.
Ndërkaq, udhëheqësja e Zyrës për Barazi Gjinore, Trumza Lila Ukmata, theksoi se trajtimi i rasteve të dhunës në familje kërkon një qasje të koordinuar institucionale dhe angazhim të vazhdueshëm për mbrojtjen, mbështetjen dhe fuqizimin e viktimave.
Në kuadër të mbledhjes u prezantuan edhe të dhëna statistikore dhe gjendja aktuale lidhur me rastet e dhunës në familje për vitin 2025, si dhe për periudhën janar–mars 2026, me qëllim të identifikimit të sfidave dhe planifikimit të veprimeve të mëtejshme në këtë fushë.
