Komuna e Gjakovës, përmes një marrëveshjeje të nënshkruar nga Kryetari i Komunës, z. Ardian Gjini, dhe z. Jahë Gecaj, Ushtrues i Detyrës së Sekretarit të Përgjithshëm në Ministrinë e Shëndetësisë, ka përfituar një autoambulancë të re, të pajisur me aparaturë përcjellëse për përmbushjen e nevojave shëndetësore të qytetarëve.
Është realizuar akti formal i pranimit dhe dorëzimit të autoambulancës, e cila është pranuar nga Udhëheqësja e Sektorit të Shëndetësisë në DSHMS, znj. Dafina Kazazi-Olloni, si dhe Drejtori i Qendrës Kryesore të Mjekësisë Familjare, z. Arben Koshi.
Komuna e Gjakovës shpreh falënderimet e saj ndaj Ministrisë së Shëndetësisë dhe në veçanti ndaj z. Jahë Gecaj për mbështetjen dhe bashkëpunimin e vazhdueshëm në realizimin e këtij projekti me rëndësi për komunitetin. Ky kontribut do të ndikojë drejtpërdrejt në rritjen e cilësisë së shërbimeve shëndetësore dhe në përmirësimin e reagimit ndaj rasteve emergjente për banorët e Komunës së Gjakovës.
