Kryesuesja e Kuvendit të Komunës, Arbënesha Kuqi, së bashku me kryetaret e Aleancës Gjinore nga Bashkia Tropojë, Shote Bashaj; Bashkia Has, Arminda Kastrati; dhe Bashkia Kukës, Aurora Guska, nënshkruan marrëveshjen për krijimin e Koalicionit Gjinor Ndërrajonal Shqipëri-Kosovë.
Ky bashkëpunim synon fuqizimin e grave në vendimmarrje, si në fushën ekonomike ashtu edhe në atë politike. Përmes këtij koalicioni do të zhvillohen projekte të përbashkëta, fushata sensibilizuese dhe shkëmbime përvojash ndërmjet grave lidere nga të dyja anët e kufirit.
Kryesuesja Arbënesha Kuqi shprehu mirënjohje ndaj Aleancës Gjinore të Bashkive Kukës, Has dhe Tropojë për bashkëpunimin dhe energjinë pozitive që po sjellin në këtë iniciativë të përbashkët. Ky bashkëpunim i ri parashikon realizimin e shumë projekteve të rëndësishme në të ardhmen.
